കൊച്ചി: ആത്മനവീകരണത്തിലൂടെ ഭിന്നതകളെ മറികടക്കുന്ന സഭൈക്യപാതകള്‍ കണ്ടെത്താന്‍ സഭകള്‍ക്ക് സാധിക്കണമെന്ന് സീറോ മലബാര്‍ മേജര്‍ ആര്‍ച്ച് ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി. 2021 എക്യുമെനിക്കല്‍ പ്രാര്‍ത്ഥനാവാരത്തോട് അനുബന്ധിച്ച് സീറോ മലബാര്‍ സിനഡല്‍ കമ്മീഷന്‍ ഫോര്‍ എക്യുമെനിസത്തിന്റെ ആഭിമുഖ്യത്തില്‍ സംഘടിപ്പിക്കപ്പെട്ട ഓണ്‍ലൈന്‍ എക്യുമെനിക്കല്‍ പ്രാര്‍ത്ഥനാകൂട്ടായ്മയില്‍ ആമുഖസന്ദേശം നല്കുകയായിരുന്നു അദ്ദേഹം.
സീറോ മലബാര്‍സഭ എക്യുമെനിക്കല്‍ കമ്മീഷന്‍ ചെയര്‍മാന്‍ ആര്‍ച്ച് ബിഷപ് മാര്‍ ജോസഫ് പെരുന്തോട്ടം നിങ്ങള്‍ എന്റെ സ്‌നേഹത്തില്‍ നിലനില്്ക്കുന്നു എങ്കില്‍ നിങ്ങള്‍ വളരെ ഫലങ്ങള്‍ പുറപ്പെടുവിക്കും എന്ന വചനഭാഗത്തെ ആസ്പദമാക്കി വിഷയാവതരണം നടത്തി. സിബിസിഐ വൈസ് പ്രസിഡന്റ് ജോഷ്വാമാര്‍ ഇഗ്നാത്തിയോസ് മുഖ്യസന്ദേശം നല്കി.
കോട്ടയം അതിരൂപത സഹായമെത്രാന്‍ ബിഷപ് ഗീവര്‍ഗീസ് മാര്‍ അപ്രേം, സീറോ മലബാര്‍ സഭ ഗ്രേറ്റ് ബ്രിട്ടണ്‍ ബിഷപ് മാര്‍ ജോസഫ് സ്രാമ്പിക്കല്‍,ചങ്ങനാശ്ശേരി അതിരൂപത സഹായമെത്രാന്‍ മാര്‍ തോമസ് തറയില്‍, മാര്‍ത്തോമ്മ സുറിയാനി സഭ സെക്രട്ടറി റവ. കെ. ജെ ജോസഫ് എന്നിവര്‍ സന്ദേശം നല്കി. സീറോ മലബാര്‍ സഭ കൂരിയ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍ അഭിനന്ദനങ്ങള്‍ അര്‍പ്പിച്ചു. മാര്‍ തോമസ് തുരുത്തിമറ്റം സമാപന പ്രാര്‍ത്ഥന നടത്തി.
റവ. ഡോ ചെറിയാന്‍ കറുകപ്പറമ്പില്‍ പ്രാര്‍ത്ഥനാകൂട്ടായ്മയ്ക്ക് നേതൃത്വം നല്കി.
