വത്തിക്കാന്‍ സിറ്റി: ഐഎസ് ഭീകരര്‍ കൊലപ്പെടുത്തിയ കോപ്റ്റിക് ഓര്‍ത്തഡോക്‌സ് ക്രൈസ്തവര്‍ എല്ലാ ക്രൈസ്തവരുടെയും വിശുദ്ധരാണെന്ന് ഫ്രാന്‍സിസ് മാര്‍പാപ്പ. 2015 ല്‍ ഐഎസ് കൊലപെടുത്തിയ 21 കോപ്റ്റിക് ക്രൈസ്തവരുടെ ഓര്‍മ്മദിനത്തില്‍ നല്കിയ വീഡിയോസന്ദേശത്തിലാണ് പാപ്പ ഇക്കാര്യം പറഞ്ഞത്. ഇവരുടെ ധീരതയെയും പാപ്പ പ്രശംസിച്ചു. ക്രിസ്തുവിന് വേണ്ടി രക്തം ചിന്താനും വിശ്വാസത്തില്‍ സ്ഥിരതയോടെ നില്ക്കാനും ഈ സഹോദരങ്ങള്‍ക്ക് ശക്തി നല്കിയ പരിശുദ്ധാത്മാവിനും ദൈവത്തിനും ഞാന്‍ നന്ദി പറയുന്നു. വിശ്വാസത്തില്‍ ഈസഹോദരങ്ങളെ വളര്‍ത്തിയ കോപ്റ്റിക് സഭയ്ക്കും വൈദികര്‍ക്കും മെത്രാന്മാര്‍ക്കും ഞാന്‍ നന്ദി പറയുന്നു. ഈ സഹോദരങ്ങളുടെ അമ്മമാര്‍ക്കും ഞാന്‍ നന്ദി പറയുന്നു. വീഡിയോ സന്ദേശത്തില്‍ പാപ്പ പറഞ്ഞു.
ഈജിപ്തിലെ കോപ്റ്റിക് ക്രൈസ്തവരെ തട്ടിക്കൊണ്ടുപോയി ശിരച്ഛേദം ചെയ്ത് കൊലപ്പെടുത്തിയത് 2015 ഫെബ്രുവരി 15 നായിരുന്നു. ഇവരുടെ രക്തസാക്ഷിത്വത്തിന്റെ ഓര്‍മ്മയില്‍ വെബിനാറും സംഘടിപ്പിക്കപ്പെട്ടു.
